Осминафинале

Во таборот на Каталонците и фановите на Барса владее нескриено задоволство од ждребот. Штудгард едвај помина во групите, а во Бундес се наоѓа при зоната за испаѓање. Сепак, секое потценување на противникот, посебно во осминафинале на ЛШ не е добро. Пред две години во фазата по групи ги измачкавме Швабите со вкупен резултат од 5-1, а потоа лесно беше и со Шалке во четвртфиналето. Дека германчишта и лежат на Барса доказ е и газењето лани на Величенствениот (што би рекол Боки). Што да се каже за останатите двојки? Муци повторно си ја оплакува судбината, а сигурно и подголтнал кога ливчето на кое пишува Челзи излезе од топчето. Мислам дека ќе го јаде, но има тука и други фактори кои може да заиграат, па очекувам неизвесна битка. И Милан немаше среќа, прашање е колку Пато, Роналдињо и Бекам ќе можат да му парираат на стариот џвакач. Баварците ги избегнаа големите имиња, но ја добија тврдоглавата и неатрактивна Фиорентина. Ако Ван Гал ја уигра екипата до февруари, не би требало да има проблем. Лион ќе биде силен тест за Реал Мадрид. Два пати го тепаа Ливерпул, а реаловци секогаш тешко поминувале во Лион. Ако остане Пелегрини до февруари, сонот да ја освојат ЛШ на свој терен може да се претвори во кошмар. Блага предност би им дал на Бордо со Олимпијакос и на Арсенал со Порто. На Драгао 1-2, дома со нервози 1-1 и топчиите одат понатаму. ЦСКА - Севиља, no comment.